Piše Marina Strugar
Foto Nikola Pejović
Ukoliko želite da kreirate savršen jesenji izgled, otkrijte koji trendovi, proizvodi će obilježiti ovu sezonu. Zamolili smo poznatu šminkerku Ivanu Pavličević da nam otkrije kako se našminkati i izgledati moderno i njegovano.
Šta je vodeći trend ove sezone kada je riječ o šminkanju?
– Minimalistička šminka koja daje licu prirodan izgled vodeći je trend aktuelne sezone, koji se izdvojio kao “must have” u beauty svijetu. Rekla bih da je tanak sloj pudera ili čak BB kreme ukoliko nemate problematičnu kožu, sa malo maskare, rumenila i nude boje na usnama sasvim dovoljno. Osim što ćete izgledati lijepo, neće svako primijetiti da ste našminkani, a svježina lica će biti u prvom planu. Iskreno, ja lično već dugo šminkam upravo na taj način, i veoma volim da vidim ovakvu vrstu šminke na drugim djevojkama te se nadam da će ovaj trend zadržati još dugo.
Koja je promjena u odnosu na ranije trendove, šta više nije aktuelno?
– Obrve su doživjele totalnu promjenu. Sve više možemo vidjeti na djevojkama deblje obrve koje izgledaju totalno prirodno, što je ranije bilo drugačije pa su se dame odlučivale za tanke obrve. Savjet je da ne pretjerujete ni sa previše debelim obrvama, jer i one mogu izgledati prenaglašeno i biti potpuno neprirodne. Takođe, u novoj sezoni preovladava sjaj na usnama, dok su do prošle godine mat usne bile nezaobilazne.
Koja modna-beauty kuća je zasijala ove jeseni kada je riječ o make up-u? Šta su prezentovali, kakav način šminkanja?
– Mnoge beauty kuće izbacile su zanimljive novitete i kada je riječ o proizvodima i tehnikama šminkanja. Ipak, definitivno bih izdvojila Dior kolekciju. Često izbacaju nove proizvode, i vrlo su inovativni što ih čini drugačijim od ostalih. Dior čini drugačijim i to što potencira prirodni look. Ovaj brend prati, lijep, nježan, damski izgled sa istaknutom prirodnom ljepotom.
U make up svijetu teško je pratiti sve novitete, koji se ove sezone izdvajaju inovativnošću i praktičnošću?
– Pastelne sjenke za oči i jednobojni make-up tonovi kao i natural glow je trend koji se apsulutno izdvojio. Boje kajsije, cigle ili srednje jake braon boje na očima, bez ajlajnera i dodavanja drugih sjenki. Uz ovo se može dodati i malo sjaja kao sjenka, uz obavezan istaknuti hajlajter i to je sve. Ove nijanse imaju moć naglašavanja prirodnog izgleda za koji uvijek trebate da glasate.
Koji proizvod smatrate dobrom osnovom za šminku?
– Postoji veliki broj proizvoda koji su moji favoriti. Zaista ulažem dosta i kupujem visokokvalitetnu profesionalnu šminku. Od tih proizoda ima mnogo dobrih. Zavisi od tipa kože klijenta, zbog čega imam veliki broj brendova koji mogu pokriti sve tipove kože. Moram naglasiti da je svim mojim kolegama u Crnoj Gori teško, jer ovdje imamo malo profesionalne šminke, a puno drogerijske. Da bi moji klijenti dobili kvalitetnu uslugu, smatram da moram raditi sa kvalitetnom i profesionalnom šminkom, stoga se trudim da iz zemalja regiona nabavim istu. Osnova šminke je dobar puder, jer oči i usne mogu izgledati savršeno, ali ako nijansa pudera nije odgovarajuća, kao i njegova tekstura i moć pokrivenosti, cjelokupan izgled ne može biti dobar.
Držite školu šminkanja, koja je najvažnija lekcija u savladavanju lijepog šminkanja?
– Najvažnija lekcija je savladavanje određivanja koja vrsta make up-a odgovara određenoj osobi. Možemo često vidjeti savršenu nijansu crvenog karmina na djevojci, ali da njoj to naprosto ne pristaje i ne stoji lijepo. Stoga djevojke koje se odluče za ovaj kurs prvo naučim šta njihovim crtama lica najbolje pristaje, koje nijanse sjenke, da li to uključuje ajlajner, koje nijanse karmina da koriste i slično. Kada se savlada ta lekcija, svaka sljedeća je mnogo lakša, a moje dosadašnje polaznice su bile sjajne i veoma brzo naučile sve tehnike.
Razvili ste poseban i prepoznatljiv stil šminkanja, kako biste ga opisali?
– Ne bih rekla da sam razvila neki prepoznatljiv stil, jer svaka djevojka izađe iz moga salona drugačije našminkana u skladu sa crtama njenog lica, prilikom… Trudim se da se svakoj djevojci posvetim potpuno i da svaku drugačije našminkam. Inspiraciju lako pronalazim, jer imam sreću da dolaze prelijepe djevojke koje mi je lako našminkati.
Kada imate slobodu da radite šminku po svojoj volji, u čemu posebno uživate?
– Uživam u svakom koraku. Moj posao je jedna vrsta umjetnosti, a kada nisam ograničena onda moja mašta i talenat posebno dolaze do izražaja.
