Najveća muzička zvijezda na našim prostorima i najuspješniji muzičar Zdravko Čolić (70) je poslije dugo godina ponovo zablistao na sceni Top Hilla. A publika je sa velikom radošću uživala uz svaku kultnu pjesmu, a njih ima mnogo. U jednom intervjuu sam pjevač je priznao da mu je najteže napraviti set listu. “Kad imaš toliko pjesama, jako je teško”, iskren je bio pjevač. A, Čola je vlasnik najdugovječnije karijere na ovim prostorima, miljenik različitih generacija, izvođač koji je punio stadione, dvorane, trgove… Koncert na Top Hillu su pratile i njegove dvije kćerke Una i Lara, koje sa suprugom Aleksandrom vaspitava da cijene prave vrijednosti. Iako je zagazio u osmu deceniju života Čolu ne napušta nevjerovatna energija na sceni i osjećanje radosti susreta sa publikom. A, da li ta magija za Čolu uopšte može prestati?
“Nikako. Magija je uvijek prisutna, a pogotovo ovdje u Crnoj Gori gdje imam mnogo prijatelja. Došao sam ovdje tri dana prije koncerta da se odmorim i družim sa njima, da pojedemo dobru ribu. Top Hill je specifična diskoteka, nije kao svaka druga. Ovdje imam uvijek osećaj da pravim koncert u nekoj mini areni, a ne nastup u klubu. Divan je osjećaj da poslije ove korone stanem na scenu i da možemo ponovo da se zabavljamo… Što bi se reklo ‘pjesma nas je održala’”.
(Marina Strugar/Aleksandar Jaredić)
